Arquivos da etiqueta: kònic

Día 1 – Estamos rodando!

Alá foi o día 1 de rodaxe de Versogramas, o primeiro documental sobre o panorama internacional da videopoesía.

Entrevistamos a Kònic, Rosa Sánchez e Alain Baumann, artistas especializados en creacións interactivas onde a palabra, a imaxe e o son xogan un papel fundamental en relación co espectador.

Dende Bélxica chegou Marc Neys, todo un referente na videopoesía internacional con case 300 videopoemas creados e unha enorme paixón polo seu traballo. Colabora con multitude de videopoetas, imparte obradoiros de videopoesía, é xurado de festivais do xénero e ten recibido el mesmo moitos recoñecementos.

día 1 swoon rodaxe versogramas

Hernán Talavera veu dende Albacete cargado de referencias e reflexións sobre o seu proceso creativo á hora de abordar un videopoema. Ás súas costas, unha longa e premiada traxectoria no xénero, que el aborda con ollos de pintor.

día 1 talavera versogramas

O último entrevistado do día foi Eugeni Bonet, o pai da videoarte española, unha peza viva da historia. Explicounos como traballa coa poesía nas súas pezas.

día 1 bonet versogramas

Aínda quedan por diante máis días de rodaxe, e seguimos necesitando todo o voso apoio. Como sabedes, aínda temos que asegurar unha parte do financiamento!

Precisamos da vosa colaboración para chegar ao obxectivo de crowdfunding. Empregaremos o recadado en sufragar gastos de rodaxe, traducir e subtitular o documental, etalonar a peza con todo o coidado que precisa, e facer as copias necesarias para a súa distribución. Para axudarnos:

Facede a vosa achega en vkm.is/versogramas

Compartide a ligazón vkm.is/versogramas entre os vosos contactos

– Se tedes amigos en prensa, faládelles de Versogramas. Se tedes amigos en centros culturais ou bibliotecas, faládelles de Versogramas. Se tedes amigos no mundo educativo, faládelles de Versogramas. Se tedes amigos na televisión, faládelles de Versogramas.

Precisamos difundir a palabra para que Versogramas chegue ás vosas pantallas!!

Entrevista a Kònic Thtr

Hoxe lembramos un anaquiño da visita a Barcelona, como parte do proceso de investigación de Versogramas.

Entrevistamos a Rosa Sánchez e Alain Baumann, de Kònic Thtr., que nos abriron as portas do seu estudo en Fabra i Coats para falarnos polo miúdo do seu traballo. Desde a plataforma artística Kònic Thtr., Rosa e Alain adícanse á creación multimedia aplicando a tecnoloxía interactiva a proxectos artísticos, nunha confluencia de arte, ciencia e novas tecnoloxías. Tamén desenvolven proxectos de investigación e formación neste campo.

Entrevista Konic

Entre a súa produción contan con varios videopoemas. Puidemos comentar a fondo a peza Golden Bricks, unha animación de texto baseada no manifesto da PAH que acadou multitude de recoñecementos. E a serie CuerpoSMS, pertencente a un proxecto multidisciplinar no que exploran o tema da (in)comunicación, a linguaxe e o corpo. Partindo da imaxe, faláronnos de palabra, de expresión, de conexións. De como combinan performance, interacción e programación para que finalmente o texto, base das súas creacións, ecoe significados ampliados.