Arquivo da categoría: Videopoema da semana

El juicio adelantado – Víctor M Mozo & DSK

Hoxe o videopoema da semana é especial. Despois do seu recorrido por festivais, estreamos online en exclusiva “El juicio adelantado”, un videopoema documental dirixido por DSK (Belén Montero e Juan Lesta) sobre o poeta Víctor M Mozo.

juicio adelantado victor mozo dsk

“El juicio adelantado” foi proxectado na Mostra de Cinema Periférico S8 (A Coruña, 2015) e foi finalista a mellor película experimental nos premios CREA da Asociación de Realizadores e Directores de Galicia (Santiago de Compostela, 2016). Ademais, a súa premiere internacional realizouse na canle ACRE TV (Illinois, Chicago 2016), unha canle exclusivamente adicada á videoarte xurdida grazas á Andy Warhol Foundation for the Visual Arts.

“Un home, un lugar, unha decisión, a historia. Un poeta e a súa poesía. A autobiografía de Víctor M Mozo en clave de videopoesía a través das catro estacións. A película amosa a flora e fauna dos lugares conectados coa súa familia e o seu pasado”.

Así arrinca a presentación deste xuízo adiantado rodado por Juan Lesta e Belén Montero. A sensibilidade de ambos, xunto á música de David Rivas Domínguez, mergúllannos nun baile de sensacións, onde as reflexións sobre o tempo, a imaxe, a escrita, a lembranza, os soños, a paisaxe e a nenez flúen acompasados cos poemas de Víctor M Mozo. É o propio poeta quen aparece en escena personificando o efecto que nel causan as súas palabras, recitando e disertando sobre os seus textos. A coidadísima estética das imaxes e a suxerente banda sonora dotan ao videopoema dunha atmosfera delicada e sensorial.

Esta non é a primeira incursión de Belén Montero e Juan Lesta no xénero da videopoesía. Xuntos teñen elaborado videopoemas para outrxs poetas, encargos para museos e proxectos en colaboración. Un resumo dos seus traballos de videopoesía pode consultarse aquí. Actualmente están a cargo de Versogramas, o que será o primeiro documental no mundo sobre o panorama internacional da videopoesía.

dirección: DSK (Belén Montero & Juan Lesta)
guión orixinal / poesía: Víctor M Mozo // guión adaptado e produción: Belén Montero // imaxe: Juan Lesta // postprodución, animación: Juan Lesta // música orixinal: David Rivas Domínguez // postprodución de son: Son do Tagalem // unha produción de: Víctor M Mozo / Esferobite © 2015 // esferobite.com // victormmozo.es

Dictionary Illustrations – Marie Craven

Dictionary Illustrations é un divertido e rítmico videopoema de Marie Craven.

Dictionary Illustrations Marie Craven

Unha rareza entre os habituais videopoemas en formato vídeo, este videopoema animado a partir de ilustracións de enciclopedia nútrese da estética gif. Resulta precisamente moi interesante esa mestura de fondo antigo e forma contemporánea: unha montaxe rítmica e picada, unha música sinxela baseada no loop, un xogo de tipografía recortada sobre fondo en movemento, un uso hipnótico do habitual estatismo dos debuxos cuxa función única é informar.

Dictionary Illustrations nace do xa desaparecido proxecto PoetryStorehouse, unha base de datos estadounidense de poemas, e audios recitados que animaba ó remix e uso libre, principalmente para crear videopoemas.

O poema de Sara Sloath é unha porta aberta á curiosidade: por que os diccionarios non teñen debuxo para os verbos, por que os trazos, por que é tan difícil definir a forma dunha folla… A voz do neno que recita transmite unha inocencia que, xunto co carácter minucioso da música, resalta o conxunto.

Dictionary Illustrations foi o gañador desta última edición do O’Bheal International Poetry-Film Competition.

Qué es el amor – Eduardo Yagüe

Eduardo Yagüe indaga na esencia das relacións no seu videopoema “Qué es el amor ”.

amor eduardo yagüe

“Qué es el amor” é un poema de Lucy English, traducido e recitado por Eduardo Yagüe. El mesmo asume a dirección do videopoema. Como actor protagonista, Steffan Carlson.

Que é o amor, pregunta o poema. As definicións do sentimento van narrando a progresión dunha relación de parella: o inicio, a descuberta, o fogar, a familia, o paso do tempo, a vellez, a vida compartida, a memoria. Non son definicións calquera, senón reconstruccións poéticas dun vínculo irrompible.

A contraposición do poema co vídeo non pode ser máis desoladora, e por tanto efectiva. Na mente elabórase quizais estoutra historia paralela: un dos protagonistas do poema, xa ancián, só nunha casa grande e baleira, intenta pasar o tempo mentres recorda, dende a máis absoluta soidade e a tristeza, aqueles momentos nos que eles “nunca, xamais, sentiron a soidade”.

Eduardo Yagüe estudou Arte Dramático e Filoloxía Hispánica, traballou como actor de teatro e cine e escribe dende ben novo. Os seus videopoemas caracterízanse precisamente polo protagonismo dos actores, e polo uso de textos xeralmente breves e de intenso contido emocional. Os seus traballos e colaboracións proxectáronse en festivais e mostras de videopoesía e videoarte en España, Holanda, Bélxica, Estados Unidos, Alemaña, Australia, Canadá, Grecia e Portugal.

Anomia – Mónica Ezquerra

Mónica Ezquerra é unha artista española que traballa a fotografía, o collage e a videoarte. En todas as súas creacións podemos apreciar un profundo pouso poético, ben subxacente, ben manifesto.

anomia mónica ezquerra

Se na serie de collages “Menagerie” Mónica diseccionaba e separaba artrópodos, en “Anomia” realiza unha labor de disección conceptual dos compoñentes dun poema. Esta peza de vídeo baséase na gravación orixinal de “Poema”, de Ulises Carrión (1977), unha letanía das categorías semánticas que conforman o esqueleto dun poema baleiro de todo significado pero exposto na súa estructura. Título. Texto. Estrofa. Verso. Palabra. En canto á imaxe, unha corrente de sinais en continuo fluxo, repeticións, duplicacións, un ensaio visual que recorda ás capas de sedimentación da terra. Como ela mesma describe:

“Sedimentos, coagulaciones, proyecciones que ejerce el lenguaje en yo.

Sus flujos, fluidos, corrientes de intensidades. Desmontaje.

Tras lo indeciso lábil del lenguaje palabra habla ¿quién queda?”